Ka haere tonu te tautoko a te kāwanatanga i ngā iwi Māori e mahi ana ki te whakaora ake me te whakanui i te mātauranga Matariki, i tana whakarite anō i te Tahua o Matariki Ahunga Nui i whakaterea i te rangi nei.  

E aro ana te tahua, e whakahaeretia nei e te Manatū Taonga i raro i te maru o te Kaitohutohu Matua  Mātauranga Matariki, a Ahorangi Rangiānehu Mātāmua, ki te whakapakari i te noho mārama me te whakatairanga i te mātauranga Matariki i runga i te whakamahi i ngā mātāpono o Matariki me ngā uara, ngā kaupapa kei te pūtake o Te Rā Aro ki a Matariki.

Hei tā te Hekeretari me Te Tumu Whakarae o Manatū Taonga, Leauanae Laulu Mac Leauanae,  “Koinei te wā e tīmata ai te whakariterite kia whai wāhi mai ki tā tātou hararei tūmatanui motuhake o Aotearoa e whakanui ana i te mātauranga Māori me Te Ao Māori.  Ko te whāinga o te tahua nei ko te tautoko kaupapa e whakahaeretia ana e ngāi Māori ki te whakanui i te mātauranga Māori mō te āhua ki Te Kāhui o Matariki.”

Hei tāna anō, “E titiro whakamua ana ki ngā hōtaka me ngā kaupapa kounga tiketike e waihanga ana i te tūāpapa o ngā mahi whakanui o nehe, o te ao hou, puta noa i ngā rohe i a mātou ka āwhina i ngā hau kāinga ki te whakanui i a Matariki tau atu, tau mai.”  

Hei tā te Kaitohutohu Matua Mātauranga Mātariki, a Ahorangi Rangi Mātāmua, “Ina whakaarohia ake a Matariki, whakaarohia te hoki ki te kāinga ki te whakanui, ki te hākari, ki te noho tahi ki te whānau me ngā hoa, nō reira e whakahau ana au kia karangahia e ngā kaitono o tēnei tau te iwi kia hoki ake ki te kāinga.”

“E aro ana te tahua nei ki te whakapakari taura here tangata, hononga tangata me te whakaaro anō ki te hunga kua whetūrangihia mai i te aranga ake o Matariki i te tau o mua atu, kia karahuihui mai te iwi ki te whakamoemiti mō ngā manaakitanga o te wā me ngā manaakitanga ka tau iho hei te tau ka takoto ake.”  

Kua tuwhera ngā tono, ka kati ā te 5 i te ahiahi o te 21 o Haratua 2023. 

Ki te tono, mō ētahi atu kōrero rānei e pā ana ki te Tahua a Matariki Ahunga Nui toro mai koa ki te paetukutuku a Manatū Taonga.

The Matariki Ahunga Nui Fund