Skip to main content

Kua Wātea he Takuhe hei Tautoko i ngā Hapori Whakanui i te Rā o Waitangi

Media release: 28 September 2022

Kua tuwhera mai te Tahua Whakamaharatanga ki te Rā o Waitangi 2023 (te Tahua) hei tautoko i ngā huihuinga ā-rohe ka whakanui i ngā rā o mua, o anamata o Te Tiriti o Waitangi.

Ko te Tahua, e whakahaeretia ana e te Manatū Taonga, ka whakaāhei i ngā rōpū hapori, ngā kaunihera ā-rohe me te tangata whenua kia mahi tahi ki te whakarite huihuinga ka whakahōhonu, ka whakawhānui i tō tātou māramatanga ki Te Tiriti.

Hei tā Glenis Philip-Barbara (Ngāti Uepōhatu, Ngāti Porou), Pou Mataaho o Te Hua i Manatū Taonga, "Ahakoa mō te karakia whakamaharatanga i te atatū, te hīkoi, te pikiniki ā-hapori, e hiahia ana mātou ki te whakamana i ngā hapori kia huihui tahi ki te whakanui i tēnei wāhanga nui whakaharahara o tō tātou tuakiri ā-motu, kia pūmau ai te wāhi ki a ia ki te anamata o Aotearoa."

"He whānui ake te Rā o Waitangi i ngā mahi whakanui ki Waitangi. I huri haere Te Tiriti ki motu nui tonu, nō reira e hiahia ana mātou ki te āwhina i ngā hapori puta noa i Aotearoa ki te whakanui i te pānga nunui o te tuhinga nei ki te waihanga i tō tātou iwi o ēnei rā."

Mō ngā mahi whakanui o te 2023, e $300,000 te tapeke o te tahua whakataetae e wātea ana mō ngā huihuinga whakamahara i te hainatanga o Te Tiriti, ka whakatairanga anō i te pakaritanga o te iwi me te hapori.

"E tuwhera ana mātou ki ngā kaitono kei te whakarite huihuinga kua roa e tū ana me te kaupapa hou ka para huarahi hou mō ngā iwi o Aotearoa kia whai wāhi atu ki ō rātou ake hapori."

I ngā tau kā taha, kua tautokona e te Tahua ētahi huihuinga mai i Rēkohu ki Murihiku ki te whakanui i ngā tini āhua o Te Tiriti pērā i te huihuinga kai, te rā tuwhera i te marae, te whai moka, te whakaari anō, tae atu hoki ki te huihuinga matihiko.

"E tūmanako ana mātou ka tukua e te Tahua nei te oranga ngākau ki ngā rōpū hapori e hiahia ana ki te whakarite huihuinga whakanui i te Rā o Waitangi."

E tuwhera ana te Tahua i tēnei wā, ka kati ā te Rāapa te 26 o Whiringa-ā-nuku 2022.

Mō ētahi atu kōrero me te tuku tono anō, haere ki te paetukutuku a te Manatū Taonga Ministry of Culture and Heritage.


Updated on 29th September 2022