Skip to main content

Kāinga

Ka tāpaehia tēnei pae tukutuku ki ngā tāne i whakaapa i roto i te Ope Taua 28 i te wā o te Pakanga Tuarua o te Ao, ā, ki o rātou whānau,

Ko te 28 he wahanga o te Mātua Tuarua o Aotearoa, arā te rōpū whawhai o te Hokowhitu Taua Tuarua o Aotearoa i te wā o te Pakanga Tuarua (1939-45). Ko te tikanga, he 700 – 750 nei ngā tāngata i roto i tēnei ope taua. Ka mutu koia tēnei he ope hōia haere raro kei te mura o te ahi. Te katoa o rātou he tūao. Ko te tikanga whakawehea ai te ope taua nei kia rima ngā ngohi. 

Te Matua o Aotearoa

Ko te Matua o Aotearoa, he 15,000-20,000 ōna nei tāngata. I whakawehea ai kia toru ngā ope hōia haere raro (arā ngā ope 4, 5 rātou ko 6), tāpiri atu ko ngā mataaro hanga pūrepo, kaitohu, rata, rātou ko ngā rōpū whakarato. I te tīmatanga kei ia ope hōia e toru ōna nei ope taua (nama 18 ki 26). Ko te Ope Taua Maori 28 he ope taua motuhake i āta hangaia tonu. I ētahi wā ka honoa ia ki ngā ope hōia e toru o te Matua. I riro mā tētahi Rūtene Kānara hei whakahaere i tēnā, i tēnā ope taua.

Te Ope Taua Māori

I whakawehea te Ope Taua Māori kia rima ngā ngohi (pērā i ērā atu o ngā ope hōia haere raro). E whā ngā ngohi pū he 125 ngā tāngata kei ia ngohi, rātou ko tētahi ngohi HQ ko tōna nei 200 ngā tāngata. Kei ia ngohi i riro mā tētahi Meiha hei whakahaere. Ko ngā ngohi e whā o te ope taua i whakahaerehia i runga anō i ngā kaupapa ā-iwi nei (i tapaina ko Ngohi A, B, C me D). Tirohia te mapi. Engari ko te ngohi HQ i whiwhi tāngata mai i te ao Māori whānui tonu.      

Waihoki, i whakawehea ia ngohi kia toru ngā ope iti. Ka mutu i whakahaerehia ia ope iti e tētahi Rūtene. E tōru anō hoki ngā wāhanga o tēnā, o tēnā ope iti - ā, i whakahaerehia ai ia wāhanga e tētahi āpiha kore-komihana (NCO). Ko te ngohi HQ i whakawehea kia ono ngā ope iti motuhake: Ngā Tohu, Whakakore Waka-Rererangi, Pahū, Kaiamo Pū, Manene, tae noa ki te Ope Ikiiki.

Ngā Ope Tānga

Ko te ope matua o te Ope Taua Māori i wehe atu i Aotearoa hei wahanga o te Matua Tuarua o Aotearoa (Taumata Tuarua) i te marama o Haratua 1940. Hei pupuri ki tōna kaha i te roanga o te tau, i rite tonu te tuku atu o ētahi rōpū taritari ope hou mai i Aotearoa. Koia anō rā ka pērā i te wā ka taumaha ngā aituā i pā mai ki te Matua.  Ko te Taumata Tuatoru o te Matua i rere atu ki te Rāwhiti Waenga i te marama o Here-turi-kōkā 1940. Whai atu i tēnā ko ngā Ope Tānga Tuarima, Tuaono, Tuawhitu hoki i te tau 1941. Ko ngā taritari ope whakamutunga kia rongo i te mura o te ahi, hei wahanga o te Ope Tānga 14 o te Matua Tuarua o Aotearoa, i tae atu ki Itari i te marama o Paenga-Whāwhā 1945. Ko te Ope Tānga 15 i tae atu ki Ihipa i te marama o Haratua 1945. I taua wā kua mutu kē te Pakanga ki Uropi.

It's raining

Te tatau o te utu

Huinga katoatia tata ki te 3600 ngā tāngata i whakarato ki rāwāhi i roto i te Ope Taua Maori i waenga i te tau 1940 me 1945. O ēnei, ko te 649 i mate i runga i te kauhanga riri, i mate rānei i a rātou e whakarato ana. Koia tēnei neke atu i te tekau ōrau o ngā tāngata nō Aotearoa i parekuratia i roto i te Matua o Aotearoa ki te Rāwhiti Waenga me Uropi. Tāpiri atu ki tēnā, 1712 ngā tāne i whara, ā, 237 i mauheretia hoki. 

E ai ki a Rūtene Whānui Bernard Freyberg, nāna nei i whakahaere te Matua Tuarua o Aotearoa "kāhore he ope taua i tua atu i te 28 mō te kahurangi o te mahi, mō te roa o te tū ki te mura o te ahi, ā, mō te taumaha hoki o ngā parekura i pā mai ki runga i a rātou. Aue taukuri e".   

lead_guitarist

Ko ngā Māori ki ētahi atu rātonga

E hia kē hoki ngā Māori i whakarato i roto i ērā atu rōpū o te Matua Tuarua o Aotearoa. Tērā ko te Wahanga Tuatoru o Aotearoa ki te Moana Nui a Kiwa, ko ngā rōpū hōia o Aotearoa, tae noa ki te Rōpū Tiaki i te Haukāinga.  Ko ētahi anō i whakarato i roto i te Ope Taua Rererangi, te Ope Taua Moana me te Ope Taua Moana Hokohoko. Ko ētahi wāhine Maōri i whakarato i roto i te Ratonga Tapuhi o te Rōpū Hōia me te Rōpū Whaitaua Wāhine, mō ngā Ope Taua Hōia, Rererangi, Moana hoki. I waenga i ngā tau 1939 me 1945 tata ki te 16,000 ngā Māori i tūao mō ngā rātonga pakanga, mai i te huinga taupori Māori heke iho i te 100,000 tōna rahi .


Updated on 23rd July 2015